Simon Kamuzinzi
Kuwa Gatandatu w’iki cyumweru gishize mu Mujyi wa Goma muri Repubulika Iharanira Demokarasi ya Congo(DRC) hafatiwe abantu 15 barimo n’Abanyarwanda, bakaba bakurikiranyweho gushaka abo kwinjizwa mu mutwe wa M23.
Umuyobozi w’umujyi wa Goma, Faustin Kapend Kamand, yabwiye Radio Okapi ko abo bantu bafashwe n’iperereza ry’igisirikare cya Congo (FARDC).
Muri uwo Mujyi wa Goma hamaze iminsi ibikorwa by’igisirikare byiswe ’Safisha Mji wa Goma’ bisobanurwa ngo ‘Sukura Umujyi wa Goma’.
Mu bafashwe harimo umusirikare wo mu ngabo za FARDC wakoreraga muri Brigade ya 11, Abanyarwanda baba i Goma mu buryo ‘butemewe’, abaregwa gurucuruza ibiyobyabwenge n’abandi bava muri Goma cyangwa muri Teritwari ya Nyiragongo.
Umuyobozi w’Umujyi wa Goma avuga ko abafashwe bose ngo bakorana n’umwanzi, bakaba bari bashinzwe kumushakira abarwanyi bashya, bakabikora rwihishwa.
Kapend avuga ko abenshi muri bo basanzwe baba mu Karere ka Nyiragongo (kamwe mu tugize Kivu ya Ruguru), bakaba ngo baje i Goma kuhashaka abarwanyi bajyana muri M23, kwiba no gukora ubundi bugizi bwa nabi.
Yagize ati “ Muri bo bamwe baturuka muri Nyiragongo, abandi muri Majengo, Kasika no muri Katoy. Biyemerera ko bagira uruhare mu rugomo rubera muri Goma kandi hari n’uwatwemereye ko yagize uruhare mu kwambura umupolisi imbunda mu minsi ishize ubwo bagenzi be bashyiraga bariyeri mu mihanda yacu”.
Uyu muyobozi avuga ko hari abandi bamaze koherezwa i Kinshasa mu nzego nkuru z’umutekano kubera uburemere bw’ibyo bakurikiranyweho.
Source: Taarifa (Kinyarwanda)
