Simon Kamuzinzi
Urwego rushinzwe Ingufu mu Rwanda, REG, rurasaba Abaturarwanda kwihanganira ikibazo cy’ibura ry’umuriro gikomeje kugaragara muri iyi minsi, ariko rukizeza ko kizabonerwa igisubizo ubwo ibyavuye mu iperereza bizaba bimaze kugaragara.
REG itangaje ibi nyuma y’uko ku mugoroba wo kuri uyu wa Kabiri tariki 03 Gashyantare 2026, hirya no hino mu Gihugu habaye ikibazo cy’ibura ry’umuriro cyamaze isaha irenga.
Geoffrey Zawadi, Umuvugizi wa REG, yaganiriye na KIGALIINFO ku murongo wa telefone agira ati “Turisegura ku bakiriya bacu n’ubwo REG ntacyo idakora mu bushobozi buhari uyu munsi kugira ngo Abanyarwanda babone umuriro udacikagurika, hari byinshi biba byakozwe ndetse na byinshi bikirimo gukorwa kugira ngo ibyo bibazo bikemuke.”
Zawadi asaba Abaturarwanda muri rusange kwihangana bakumva ko ibura ry’umuriro ari ikintu gishoboka, gihoraho kandi ko nta burangare buba bwabayeho, bikaba ngo biterwa n’ikibazo cyabayeho mu nzira uwo muriro unyuramo, cyangwa aho uturuka ku ruganda ruwutanga, cyangwa ku ikibazo cy’agace runaka.”
“Hari ibintu byinshi bishobora gutuma umuriro ubura, ni yo mpamvu tugira abatekinisiye bakora amasaha 24/24, icyaraye kibaye mu ijoro ryakeye ku mugoroba turacyarimo kugikorera iperereza kugira ngo tumenye umuzi wacyo w’aho cyaturutse,”nk’uko Zawadi yakomeje abisobanura.
Zawadi avuga ko atakwemeza cyangwa ngo ahakane niba ikibazo cyarahereye ku ngomero z’amashanyarazi u Rwanda rusangiye n’ibindi bihugu, nk’uko ari ho cyagaragaye ubushize.
Avuga ko n’ubwo bafata ingamba zingana iki kubura k’umuriro w’amashanyarazi ari ibintu bisanzwe, akaba agira inama abafite ibikorwa byakwangirika kujya bashaka ubundi buryo nko gukoresha imirasire y’izuba cyangwa imoteri zitanga amashanyarazi. Mu rugo na ho abantu bakaba bashobora gutunga ibikoresho bisharijwa bikabika umuriro kugira ngo nihavuka ikibazo bataba mu kizima.
Ibura ry’umuriro w’amashanyarazi mu Rwanda ryatangiye kwigaragaza cyane kuva mu mpera z’umwaka ushize wa 2025, aho kuri uyu wa Kabiri yari inshuro ya gatatu ikibazo kibayeho kikamara isaha irenga.
